(155) 11. กมฺมูปจยกถา

[737] อญฺญํ กมฺมํ อญฺโญ กมฺมูปจโยติ? อามนฺตาฯ อญฺโญ ผสฺโส, อญฺโญ ผสฺสูปจโย; อญฺญา เวทนา, อญฺโญ เวทนูปจโย; อญฺญา สญฺญา, อญฺโญ สญฺญูปจโย; อญฺญา เจตนา, อญฺโญ เจตนูปจโย; อญฺญํ จิตฺตํ, อญฺโญ จิตฺตูปจโย; อญฺญา สทฺธา, อญฺโญ สทฺธูปจโย; อญฺญํ วีริยํ, อญฺโญ วีริยูปจโย; อญฺญา สติ, อญฺโญ สตูปจโย ; อญฺโญ สมาธิ, อญฺโญ สมาธูปจโย; อญฺญา ปญฺญา, อญฺโญ ปญฺญูปจโย; อญฺโญ ราโค, อญฺโญ ราคูปจโย…เป.… อญฺญํ อโนตฺตปฺปํ, อญฺโญ อโนตฺตปฺปูปจโยติ? น เหวํ วตฺตพฺเพ…เป.…ฯ

[738] อญฺญํ กมฺมํ, อญฺโญ กมฺมูปจโยติ? อามนฺตาฯ กมฺมูปจโย กมฺเมน สหชาโตติ? น เหวํ วตฺตพฺเพ…เป.…ฯ

กมฺมูปจโย กมฺเมน สหชาโตติ, อามนฺตาฯ กุสเลน กมฺเมน สหชาโต กมฺมูปจโย กุสโลติ, น เหวํ วตฺตพฺเพ…เป.…ฯ

กุสเลน กมฺเมน สหชาโต กมฺมูปจโย กุสโลติ? อามนฺตาฯ สุขาย เวทนาย สมฺปยุตฺเตน กมฺเมน สหชาโต กมฺมูปจโย สุขาย เวทนาย สมฺปยุตฺโตติ? น เหวํ วตฺตพฺเพ…เป.… ทุกฺขาย เวทนาย…เป.… อทุกฺขมสุขาย เวทนาย สมฺปยุตฺเตน กมฺเมน สหชาโต กมฺมูปจโย อทุกฺขมสุขาย เวทนาย สมฺปยุตฺโตติ? น เหวํ วตฺตพฺเพ…เป.…ฯ

[739] กมฺมูปจโย กมฺเมน สหชาโตติ? อามนฺตาฯ อกุสเลน กมฺเมน สหชาโต กมฺมูปจโย อกุสโลติ? น เหวํ วตฺตพฺเพ…เป.…ฯ

อกุสเลน กมฺเมน สหชาโต กมฺมูปจโย อกุสโลติ? อามนฺตาฯ สุขาย เวทนาย สมฺปยุตฺเตน กมฺเมน สหชาโต กมฺมูปจโย สุขาย เวทนาย สมฺปยุตฺโตติ? น เหวํ วตฺตพฺเพ…เป.… ทุกฺขาย เวทนาย…เป.… อทุกฺขมสุขาย เวทนาย สมฺปยุตฺเตน กมฺเมน สหชาโต กมฺมูปจโย อทุกฺขมสุขาย เวทนาย สมฺปยุตฺโตติ? น เหวํ วตฺตพฺเพ…เป.…ฯ

[740] กมฺมํ จิตฺเตน สหชาตํ, กมฺมํ สารมฺมณนฺติ? อามนฺตาฯ กมฺมูปจโย จิตฺเตน สหชาโต, กมฺมูปจโย สารมฺมโณติ? น เหวํ วตฺตพฺเพ…เป.… กมฺมูปจโย จิตฺเตน สหชาโต , กมฺมูปจโย อนารมฺมโณติ ? อามนฺตาฯ กมฺมํ จิตฺเตน สหชาตํ, กมฺมํ อนารมฺมณนฺติ? น เหวํ วตฺตพฺเพ…เป.…ฯ